Archive for the ‘Algemein Nuuts’ Category

h1

Prins Roy I en Prinses Fabianne

dinsdag 23 november 2010

't Nuuje Prinsepaar van V.V. De Steinakker


Leef Luuj,

Bie deze wil ich mich aeve veursjtèlle es Prins Roy I van VastelaovesVereniging De Steinakker.
Ich, Roy van Mulken, bèn 28 jaor en höb ein geweldige relasie mit mien Prinses Fabianne Laumen. Ich bèn gebaore op 31-08-1982 in ’t oud ziekehoes in Gelaen. Mien hele laeve woon ich al in Stein bie mien ouwers Maria en René van Mulken (femielje van Mulken is baeter bekènd es die van Jate). Ouch höb ich nog eine broor Patrick dae taeves miene adjudant is mit die gekke vastelaovesdaag.
Ich wirk op de assemblage-aafdeiling van de Vixia in Zitterd. Veer wirke in de Joea-groep en make dao spegels mit verlichting veur hotels.
Mien groeatste hobby is voetbal. Daorom is ’t ouch neet gek dat ich dao dan ouch 4 daag in de waek mit bezig bèn. Bie voetbalclub R.K.S.V. De Ster oet Stein bèn ich aktief bezig es traener van de Ster A2. Zelf doon ich jederweek ’n uurke balle in de zaal bie Z.V.V. De Kamp 2000 in Stein. Verder doon ich graag computere en mijn vriendin plaoge.
Bie deze wil ich jederein oetnweudige veur mien resepsie op vriedig 18 februari in Trefcentrum Kerensheide. Ich sjleet aaf mit mien liefsjpreuk:
Mit de vastelaovend lègk ich de bal aeve aan de kentj, want dan loup ich ich drie daag veurop in ’t Steinder lentj.

Advertenties
h1

Prinsoetroping 20 November

donderdag 28 oktober 2010

Poster Prinsoetroping

Beste vastelaovesvrunj,

De rouk van de kamersjöt is nog neet good en waal opgetrókke, de klanke van ’t Vastelaoves Leedjes Konkoer likt nog veesj in oos gehäör of veer moote al aafsjied numme van Prins Jeannot I mit zien prinses Thea en Jeugdprins Mike I.

Lang hove veer echter neet te treuren, want Prins Jeannot I maakt plaats veur ooze nuuje Hoeaglustigheid.

Names leden en besjtuur van VastelaovesVereniging De Steinakker zeet geer van harte welkom op:

Zaoterdig 20 november 2010, vanaaf 20:11 oer.

Deze aovend, mit tal van artiesten, weurd gehouwe in

Trefcentrum Kerensheide
Schineksstraot 11
6171AM in Stein
046 – 433 2076

h1

Effe veursjtelle: Prins Jeannot I

donderdag 17 december 2009


Leef luuj,

Ich Jeannot Haenen, es nuuje Prins van VastelaovesVereniging De Steinakker van ’t seizoen 2009-2010 wil mich effekes aan uch veursjtèlle.
Ich bèn eine jóng van 42 en höb ein good laeve same mit mien vrouw Thea en ooze zoon Mike.
Ich bèn gebaore in Berg aan de Maas in café De Keigelbaan. Later zin veer nao Stein verhoesd.
Op dit moment wonen veer zo’n zeven jaor in Nuujdorp, in de Damiatesjtraot.
Van mien hobby höb ich mien beroep gemaakt; namelik Meister-Sjilder. Naeve de kwas hou ich väöl van mien vösj; de Koi’s. Ouch doon ich gaer aan computeren, camperen en nog väöl mjèa.
Ich höb ummer al ens Prins wille waere. Wie de jònges van de Steinakker bie mich op de sjtóp sjtónge om mich te vraoge, woord eine lang gekoesterde druim van mich waor.
Bie deze wil ich alvast jederein van harte oetnwuedige op mien receptie die op vriedig 22 januari 2010 gehouwe weurd in Café ’t Houterein.
Tot sjlot wunsj ich jederein eine zalig kerst, gelökking nuujjaor en veur sjtraks drie fantastise vastelaovesdaag en ich sjleet aaf mit miene liefsjpreuk:
Mit dees daag laot ich de kwas in de kas en mit de scepter in mien rechter hendj,
Regeer ich mit de vastelaovend euver ’t Steinakker lendj.

h1

Zaoterdig 21 november: Prinsoetreuping

dinsdag 10 november 2009

Prins Henri AlaafBèste Vastelaovesvrunj,

’t Carnavalsseizoen is nog maar net begoos. De rouk van de kamersjöt is amper opgetrokke of oos sjteit al ein zjwaore bepreuving te wachten.

Bènnekórt zulle veer aafsjiet gaon numme van Prins Henri I en Prinses Miranda, die aafgeloupe twië jaor väöl veur oos höbbe beteikend.

Lang hove veer echter neet te treuren, want Prins Henri I maakt plaats veur ooze nuuje Hoeaglustigheid. Om 11 minute op 11 ’s aoves is ’t zaowiet. Dan weurd de nuuje Prins van VastelaovesVereniging De Steinakker van 2010 oetgeroope.

Names leden en besjtuur van VastelaovesVereniging De Steinakker zeet geer van harte welkom op:

Zaoterdig 21 november 2009, vanaaf 20:11 oer.

Deze aovend weurd gehouwe in

Trefcentrum Kerensheide
Schineksstraot 11
6171AM in Stein
046 – 433 2076

h1

Nuutsbericht

zaterdag 19 september 2009

Welkom op de nuuje sait van VastelaovesVereniging De Steinakker. Vanaaf vandaag kènt geer hie allerlei nuuts-artikele over oos laeze. Deze sjtökke versjiene namelik neet allemaol in de Schakel. Ouch is ’t mäögelik om later nog èns in ’t archief ouwe sjtökke trök te zeen. Nao verloup van tied zulle sjteeds miè berichte hie gaon versjiene. Kiek dus maar èns gereigeld hie nao bènne of d’r nog nuuts is.

Tot sjlòt kènt ’t waal èns gebäöre dat links of rechs sjrieffoute in de tekst veurkómme. Bie deze ekskuzeer ich mich alvas hieveur.